Num 5 | NdeIBE | STEP | UJehova wathi kuMosi,

Numbers 5

Ubungcwele bezihonqo

1 UJehova wathi kuMosi, 2 “Tshela abako-Israyeli ukuthi basuse ezihonqweni wonke olomkhuhlane wejwabu othelelwanayo loba ophuma ubovu loba bungobunjani, loba engongcolileyo ngokomkhuba ngenxa yesidumbu sofileyo.

3 Susani ngokufananayo loba ngowesilisa loba ngowesifazana; kumele limsuse ukuze angangcolisi isihonqo sakwabo; ngoba ngihlala khona phakathi kwabo.”

4 Abako-Israyeli bakwenza lokho; babakhuphela ngaphandle kwezihonqo. Bakwenza njengokulaywa kukaMosi nguJehova.

Umlayo omayelana lokuhlawula komuntu olecala

5 UJehova wathi kuMosi, 6 “Tshono kwabako-Israyeli uthi: ‘Nxa indoda loba umfazi onele omunye loba ngayiphi indlela etshengisele ukungathembeki kuJehova, lowomuntu ulomlandu 7 njalo kumele avume isono sakhe. Kahlawule ngokugcweleyo icala lakhe, engezelele ingxenye yesihlanu ekuhlawuleni lowo amoneleyo. 8 Kodwa uba lowo engelasihlobo okungahlawulwa kuso icala, ihlawulo ngelikaJehova, kodwa lizaphiwa umphristi, kanye lenqama azamenzela ngayo indlela yokubuyisana. 9 Izipho zonke ezingcwele ezilethwa ngabako-Israyeli kumphristi zizakuba ngezakhe. 10 Izipho zendoda inye ngayinye ezingcwele ngezayo, kodwa lokho indoda ezakupha umphristi ngokomphristi.’ ”

Ukuhlolwa kowendileyo ongaziphethe

11 UJehova wathi kuMosi, 12 “Khuluma labako-Israyeli ubatshele ukuthi: ‘Nxa umfazi wendoda ephambuka engathembeki endodeni

13 ngokulala lamanye amadoda, kodwa lokhu kungasobala endodeni yakhe lehlazo lelo lingabonakali (njengoba kungelafakazi njalo engabanjwanga ekwenza), 14 kodwa indoda ikhulelwe yibukhwele ibe isimnakanela umfazi wayo kanti ungcolile – loba ilobukhwele imnakanela kodwa yena engangcolanga –

15 kumele ithathe umfazi wayo iye laye kumphristi. Phezu kwalokho kumele imphathele ifulawa yebhali eyingxenye yetshumi yehefa. Akumelanga ithele amafutha phezu kwayo loba afake impepha phezu kwayo, ngoba kungumnikelo wobukhwele wamabele, umnikelo wokukhumbuza ukuthi kulecala.

16 “ ‘Umphristi uzamletha owesifazana ammise phambi kukaJehova. 17 Abesethatha amanzi angcwele ngembiza yomdaka athele emanzini uthuli olubuthwe phansi ethabanikeleni. 18 Ngemva kokuba umphristi eseke wamisa owesifazana phambi kukaJehova kumele atshombulule izinwele zakhe abesefaka ezandleni zakhe umnikelo wokukhumbuza, umnikelo wobukhwele wamabele, umphristi yena uzabe ephethe amanzi ababayo aletha isithuko. 19 Ngalokho-ke umphristi uzafungisa owesifazana athi kuye, “Nxa kungelandoda eke yalala lawe loba ungazange uphambuke ungcole wena wendele endodeni yakho, akuthi lamanzi ababayo aletha isithuko angakulimazi.

20 Kodwa nxa uphambukile wena wendele endodeni wazingcolisa ngokulala lenye indoda engasumkakho” – 21 lapho umphristi kufanele afungise owesifazana ngesithuko lesi – “sengathi uJehova angenza abakini bakuthuke bakuhlamuke lapho esebangela ukuba ithangazi lakho linciphe kuthi isisu sakho sikhukhumale.

22 Akuthi amanzi la aletha isethuko angene emzimbeni wakho ukuze isisu sakho sikhukhumale lethangazi lakho linciphe.” “ ‘Ngakho owesifazana uzakuthi, “Ameni. Akube njalo.”

23 “ ‘Umphristi uzaloba lezi zethuko ogwalweni azigezisele emanzini ababayo.

24 Uzanathisa owesifazana amanzi ababayo aletha isethuko, wona amanzi azamzwisa ubuhlungu nxa esewanathile. 25 Umphristi uzasusa ezandleni zowesifazana umnikelo wamabele obukhwele, awuzunguze phambi kukaJehova abesewuletha e-alithareni.

26 Umphristi abesechupha-ke ngesandla umnikelo wamabele njengomnikelo wesikhumbuzo awutshisele e-alithareni; ngemva kwalokho kumele anathise owesifazana amanzi la. 27 Nxa ezingcolisile ngokungathembeki kumkakhe, kuzakuthi lapho enatha amanzi aletha isethuko, angene emzimbeni abangele ubuhlungu; isisu sakhe sizakhukhumala ithangazi lakhe linciphe, abe ngothukiweyo ebantwini bakibo. 28 Kodwake nxa lo owesifazana engazingcolisanga emsulwa, uzakhululwa kulelo cala abelakho ukuthola inzalo.

29 “ ‘Ngakho-ke, lo yiwo umlayo wobukhwele nxa owesifazana ephambukile wazingcolisa yena endile, 30 loba nxa indoda ifikelwa yibukhwele ngoba ilesazela ngomkayo. Umphristi uzamisa owesifazana phambi kukaJehova asebenzise lumlayo ngokugcweleyo kowesifazana. 31 Indoda izabe imsulwa ekoneni konke, kodwa owesifazana uzathwala izehlakalo zonke zesono sakhe.’ ”